صحيفة نبض الشعب الاسبوعيه رئيس التحرير جعفر الخابوري

خلصت من كام يوم مسلسل " عملة نادرة"
زعلانة اووووى ان نيللى كريم عملت عمل زى ده بعد ذات و سجن النسا ولأعلى سعر و100 وش وغيرهم .. بعد مابقى اسمها تريد مارك ويخليك تقرر تشوف المسلسل اللى هتقدمه للأسف هتخلى ناس كتير تتردد .
وزعلى اكتر على محمد لطفى ،، مش هاممنى جمال سليمان لأنه عمره ماعجبنى وبقاله عشرميت سنة بيمثل مصرى وصعيدى ولسة مش عارف يتقن اللهجة وبيأفور كتير ، ولا هاممنى كمال ابو رية لأنه دايماً باهت وولا مرة حسسك انه احدث فارق فى اى عمل
لكن لطفى حد تقيل وله بصمة .. ازاى قبل الدور المهلهل المشوه ده ؟!!
كل الممثلين بيخدموا على السوبر وومان اللى ناقص تطير وتطلع نار من بقها !!
وعلى الرغم من كل الشنبات والسلاح والعصابات اللى فى المسلسل لكن هى اللى بتفكر وتخطط وتعمل كل حاجة والاخر كمان بتقتل الطاغية بايديها
تقليد ممسوخ من الفيلم العبقرى "شىء من الخوف" .. لكن شتااااان بين نادرة وفؤادة .
لا الصعايدة كدة ولا قطاع الطرق نازلين طالعين الجبل عادى كدة والناس كلها بتتعامل معاهم
الحسنة الوحيدة فى المسلسل هى عودة "احمد عيد" فى دور يليق بموهبته وجديد عليه .. بعيداً عن افورة المؤلف "مدحت العدل" والمخرج "محمد جمال العدل" .. لكن عيد عمل الشخصية فى حدود السكريبت المكتوب واثبت انه يستحق ادوار مهمة فى اعمال مقبلة .
واخيرا .. لو نيللى كريم هتفضل تحشر لنا جوزها "هشام حاشور" او عاشور .. تبقى بتحكم على اعمالها الجاية بالفشل لأنه عديم الموهبة تماما ومعندوش كاريزما والمصيبة ان الاول كانوا بيدوه ادوار صغيرة لكن المرة دى دور اساسى .. ومش بعيد ياخد بطولة المسلسل الجاى!
خليه يروح يمرن اسكواش افيد له ولمصر ولأعصابى