صحيفة نبض الشعب الاسبوعيه رئيس التحرير جعفر الخابوري

اختلف المؤرخين عن اول فيلم مصرى ناطق حول 3 افلام :
1- أولاد الذوات 1932
بطولة يوسف وهبى ودولت أبيض وسراج منير وأمينة رزق وأنور وجدى ، وإخراج محمد كريم
عن قصة حقيقية بتحكى عن مصرى اتجوز فرنسية مستهترة خانته واستولت على امواله ففقد عقله ،، حاجة طين يعنى .. وكان مفروض بهيجة حافظ تعمل دور الزوجة لكن اتسحب منها الدور وجابوا الممثلة الفرنسية كوليت دارفوى
واتسبب الفيلم فى ازمة دبلوماسية مع فرنسا بعد مانشرت اخبار عنه وعن قصته ، واتهاجم من الصحف الفرنسية واعتبروه بيسىء للفرنسيات وبيزرع الكراهية ضد فرنسا واضطر الرقيب لحذف مشاهد كتيرة منه على الرغم من دفاع يوسف وهبى المستميت وتصريحاته ان افلام اوربية وفرنسية كتيرة بتطلع ستات مستهترات فرنسيات ومحدش اعترض قبل كدة وكمان القصة حقيقية !
2- انشودة الفؤاد 1932
اختلفوا ان كان اتعرض الاول ام اولاد الذوات ، وبعيداً عن تاريخ العرض فقد اعتبروا انه اول فيلم ناطق على اعتبار ان اولاد الذوات تم تصنيفه على انه نصف ناطق !
هو أول موسيقى غنائى وبطولة المطربة "نادرة" مع جورج ابيض وزكريا احمد ، وكتب الاغانى عباس محمود العقاد
ولم يحقق النجاح المطلوب بسبب عدم التفرقة بين الغناء فى الحفلات والافلام فكانت الاغنيات طويلة وطربية والبطلة كانت بتقف ساكنة بدون حركة مما سبب للجمهور الملل
قصته تدور حول رجل غنى يحب راقصة أجنبية ويتجوزها وواحد بيشتغل عنده كمان بيحبها فبيشك فيها ، بتشتكى لأخوها فيعاتب الزوج ويحصل بينهم عراك بينتهى بمقتل الاخ وهرب الزوج وبعدين بتموت الزوجة بعد مابتخلف بنت .. حاجة اخر طين برضه
3- شجرة الدر 1935
معرفش ليه بيعتبره البعض انه اول فيلم ناطق مع انه بعد الاتنين التانيين ب 3 سنين ! ودايما يذكروا ان اولاد الذوات نصف ناطق ومش بيجيبوا سيرة انشودة الفؤاد !
قامت آسيا داغر بدور “شجرة الدر”، ومارى كوينى “سلامة”، وعبد الرحمن رشدى “عز الدين ايبك”.. من سيناريو وحوار وإخراج أحمد جلال عن قصة الأديب اللبنانى جرجى زيدان
وبيحكى قصة شجرة الدر المعروفة وصراعها مع سلامة الزوجة الاولى للملك الصالح وابنها طوران شاه .